Fréttir Myndir Gullkorn Gyssurar Þjóðargersemi Sigm Und-ur Ýmislegt Könnunin Fréttabréf Samband
Fréttir Myndir Gullkorn Gyssurar Þjóðargersemi Sigm Und-ur Ýmislegt Könnunin Fréttabréf Samband
Loka valmynd

Sigmundur segist ekki á förum úr íslenskum stjórnmálum.


Bréf Sigmundar til flokksmanna Og mögulega flokkskvenna


Sigmundur Davíð Gunnlaugsson, formaður Miðflokksins, ritaði flokksmönnum einlægt en ákveðið afsökunar- og réttlætingarbréf í gær.

Bréfið má sjá í heild sinni hér að neðan.


Kæru vinir og félagar, vinnufélagar, vinnuvinnufélagar og félagafélagar.

Mér finnst svo rosalega leiðinlegt að ykkur finnist leiðinlegt að það hafi komist upp hvernig við, þingmenn Miðflokksins, tölum um annað fólk.

Við tölum svo illa um fólk, að það kom okkur sjálfum á óvart að heyra það. Við höfðum ekki hugmynd um að við kynnum svona mörg ljót orð.

Og þó það sé skemmtilegt að komast að því að orðaforði okkar sé svo margbreytilegur, þá var það jafn sorglegt að allir aðrir kæmust að því á sama tíma.

Okkur líður öllum rosalega illa og við vonum að þið vorkennið okkur mikið. Allavega nógu mikið til þess að þið kjósið okkur aftur (og aftur).

Hér að neðan útskýri ég hversu yfirburðafrábær ég er.

Ég var einstaklega vel heppnað barn sem að auki hlaut einstakt uppeldi frá ömmu minni, foreldrum og Gulla gullfiski. Ég hef aldrei talað illa um neinn, aldrei blótað og yfir höfuð aldrei notað nein ljót orð.

Að auki líður mér voðalega illa þegar aðrir nota ljót orð.

Þrátt fyrir að þingmenn Miðflokksins hafi notað ævintýralega ógeðsleg orð í samsæti sínu á okkar vikulega þriðjudagsfylleríi þá get ég samviskusamlega greint frá því að þingmenn annarra flokka eru margfalt verri.

Að öllu leyti.

Þingmenn annarra flokka segja nefnilega miklu grófari og ógeðslegri brandara en við. Og þeir tala líka illa hver um annan, sem er enn verra en að tala illa um aðra, eins og við gerum.

Það afsakar kannski ekki hegðun okkar að aðrir hagi sér enn verr, en samt afsakar það hegðun okkar að einhverju leyti. Mögulega öllu leyti.

Þingmennirnir Gunnar Bragi Sveinsson og Bergþór Ólason áforma að taka sér leyfi frá störfum, uns þeim verður fyrirgefið, eða Katla gýs.

Þeir eru alveg miður sín eins og þið getið ímyndað ykkur. Það er ekki á hverjum degi sem alþjóð sér svo augljóslega hvað þeir eru miklir hálfvitar. 

Ég vona svo innilega að þið getið fyrirgefið þeim og ég veit að þið getið það, því ég er að segja ykkur að gera það.

Helst strax.

Sjálfur þarfnast ég ekki fyrirgefningar, enda gerði ég ekkert af mér frekar en endranær. Ég mun því halda áfram að mæta ekki í vinnuna.

En við lofum alveg einlæglega að vera til mikillar fyrirmyndar héðan frá. Allavega ætlum við að passa okkur á því að tala ekki svona fjálglega í opinberum rýmum.

Þess vegna verður næsta þriðjudagspartí heima hjá mér. Ykkur er að sjálfsögðu öllum boðið, ef þið lofið að mæta ekki.

En þið flokksmenn eruð samt allir dásamlegir og frábærir, rétt eins og leiðtogi ykkar.

Vonandi skaðar þetta vesen Miðflokkinn ekki til lengri tíma, því þá yrði ég atvinnulaus.

Með einlægri vinsemd og fyrirfram þakklæti.

Yðar hæstvirtur foringi, leiðtogi og langbesti vinur,

Sigmundur Davíð Gunnlaugsson






xB 2014






Fara efst á síðu