Fréttir Myndir Gullkorn Gyssurar Þjóðargersemi Sigm Und-ur Ýmislegt Könnunin Fréttabréf Samband
Fréttir Myndir Gullkorn Gyssurar Þjóðargersemi Sigm Und-ur Ýmislegt Könnunin Fréttabréf Samband
Loka valmynd

Sjálfstæðismenn segja að nýju kjörklefunum sé fyrst og fremst ætlað að auka gagnsæi í kosningum.


Lögbannið dugar ekki eitt og sér til að halda völdum Kosningamaskína Sjálfstæðisflokksins komin á fullt, og rúmlega það


Innan úr reykfylltum bakherbergjum Valhallar berast nú vonbrigðastunur og niðurbæld pirringsóp, eftir að í ljós kom að fylgi Sjálfstæðisflokksins rauk ekki upp þegar allur fréttaflutningur af formanni hans var gerður ólöglegur.

Flokkurinn hefur því sett saman vandaða og ítarlega áætlun sem á að tryggja honum áframhaldandi völd í landinu. 


Enda finnst flokksmönnum of erfitt að græða þegar þeir þurfa að spila eftir sömu reglum og aðrir. Það er flokknum því algjörlega nauðsynlegt að komast í ríkisstjórn, nú sem endranær.

Skrímsladeild Hannesar og Hálfvitadeild Ásmundar voru auðvitað formlega ræstar eins og alltaf þegar kosningabarátta hefst, en nú hefur embættismannadeild Þórólfs einnig verið keyrð í gang á ofursnúningi. Henni er ætlað að koma í veg fyrir að aðrir flokkar geti komið sjónarmiðum sínum á framfæri, og eins að stöðva samstundis, ef ekki fyrir fram, alla gagnrýni á flokkinn.

Sérstök fjölmiðladeild hefur verið stofnsett, með Loga Bergmann í fararbroddi. Hann mun lesa flokksfréttir í beinni útsendingu úr Valhöll allan sólarhringinn, sem verður sjónvarpað og útvarpað á öllum tiltækum rásum. Öðrum fjölmiðlum verður lokað, að minnsta kosti tímabundið.

Vilhjálmur Bjarnason mun svo leiða sérstaka útstrunsunardeild, sem hefur það eina markmið að strunsa út af fundum með offorsi og látum.

Dugi þessar aðgerðir ekki til að tryggja flokknum yfirburðakosningu, þá skiptir það engu máli, því rúsínan í pylsuendanum er enn eftir.

Settir verða upp nýir og betrumbættir kjörklefar. Þeir verða gagnsæir, og staðsettir á berangri, í nágrenni við kosningaskrifstofur Sjálfstæðisflokksins, svo að útsendarar flokksins geti fylgst með því hvernig landsmenn greiða atkvæði. Engum verður hleypt út úr kjörklefanum, nema sá hinn sami geti sýnt fram á það með tilhlýðilegum hætti, að hann hafi kosið rétt.






Herrann í Hádegismóum...






Fara efst á síðu