Fréttir Myndir Gullkorn Gyssurar Þjóðargersemi Sigm Und-ur Ýmislegt Könnunin Fréttabréf Samband
Fréttir Myndir Gullkorn Gyssurar Þjóðargersemi Sigm Und-ur Ýmislegt Könnunin Fréttabréf Samband
Loka valmynd

Framtíðarsýn samtakanna felur í sér að börn læri sér til gagns en ekki gamans


Samtök hatvinnulífsins kynna sömu tillögur og venjulega Vinna við þessa skýrslu tók tvö ár, en hún er samt nákvæmlega eins og síðasta skýrsla


Samtök hatvinnulífsins gáfu nýlega út skýrslu sem nefnist „Menntun með þarfir fyrirtækja að leiðarljósi - Fólk má fokka sér.“

Í henni er að finna nokkrar framúrstefnulegar og verulega sæberpönkaðar tillögur, sem miða að því eins og titill skýrslunnar gefur til kynna, að koma enn og aftur á framfæri þeim sjónarmiðum samtakanna að fólk eigi ekki að mennta sig með sínar eigin langanir að leiðarljósi, heldur eigi það fyrst og fremst að hafa þarfir atvinnulífsins í huga.


Helstu tillögur

Leikskóli: Nauðsynlegt er að tryggja öllum börnum leikskólapláss frá fæðingu svo að mæður þurfi ekki að missa svo mikið sem eina mínútu úr vinnu. Best væri ef hægt væri að geyma börnin í leikskólum allan sólarhringinn svo að barneignir komi sem allra minnst niður á almennum fyrirtækjarekstri í landinu.

Allar fæðingar þurfa að eiga sér stað að næturlagi svo að starfsfólk þurfi ekki leyfi frá vinnu, enda fæðingar flokkaðar sem áhugamál og ættu því ekki að fara fram á vinnutíma.
Konur í vaktavinnu sem þurfa að sinna næturvöktum geta nýtt matartíma sinn til fæðingastúss, hafi hann ekki þegar verið aflagður. Annars geta þær einfaldlega haft með sér fötu í vinnuna og fætt í hana.

Grunnskóli: Skólaárum verði fækkað úr tíu í tvö. Þessu markmiði má auðveldlega ná með því að sleppa alveg sumar-, jóla- og páskafríum og að auki helgarfríum í öllum mánuðum sem enda á „ber“ eða „úar“. Þetta hefur líka í för með sér að foreldrar verða ekki jafn bundnir af börnum sínum og fá því aukinn frítíma sem þeir geta nýtt til vinnu.

Allar námsgreinar sem eru ekki nauðsynlegar að mati Samtaka hatvinnulífsins verða felldar niður. Í staðinn skulu koma greinar eins og „stimpilklukkufræði“, „Alltaf í vinnunni“ og „Fyrirtækjaræði - Hættu nú að hugsa alltaf um sjálfa/n þig.“

Með fækkun skólaára er svo hægt að koma börnum í menntaskóla áður en þau verða átta ára og þá eiga þau að skila sér nægilega vel menntuð öguð á vinnumarkað við tíu ára aldur.

Háskóli: Engir fá að fara í háskóla nema þeir sem eiga foreldra sem geta sýnt fram á og sannað að þeir tilheyri Sjálfstæðisflokknum og hafi greitt öll flokksgjöld síðustu 10 ár að lágmarki. Aðrir fara beint á vinnumarkað í láglaunastörf sem þeim verður úthlutað af Flokknum.

Almennt: Allir skólar á grunnskólastigi (þar sem skólaskylda er í gildi) verða einkareknir, enda sýna mælingar að auðveldast er fyrir útvalda Sjálfstæðismenn með takmarkað rekstrarvit að græða á þjónustu sem ríkið borgar fyrir og fólki er skylt að nýta sér.

Sumum kann að finnast þessar dystópísku hugmyndir hrollvekjandi. Engu að síður voru klikkuðustu tillögurnar fjarlægðar úr skýrslunni fyrir útgáfu og verða geymdar til betri tíma, enda vilja samtökin gjarnan líta út fyrir að vera hófstillt og láta sem þau hafi hag vinnuþræla sinna að leiðarljósi.

Þar má nefna tillögur sem snúa að því að græddar verði koffínsprautur í starfsfólk svo það þurfi minni svefn og geti unnið lengri vaktir og á meiri hraða. Að sama skapi var í upphaflegri skýrslu viðruð sú sívinsæla hugmynd samtakanna að starfsþrælar gangi með bleiur svo þeir þurfi ekki að sóa tíma sínum atvinnurekenda sinna í óþarfa klósettferðir.

SH
RÚV
NY Times







xB 2014






Fara efst á síðu