Fréttir Myndir Gullkorn Gyssurar Þjóðargersemi Sigm Und-ur Ýmislegt Könnunin Fréttabréf Samband
Fréttir Myndir Gullkorn Gyssurar Þjóðargersemi Sigm Und-ur Ýmislegt Könnunin Fréttabréf Samband
Loka valmynd

Hér er fín mynd af sykruðum drykkjum þar sem ekki er hægt að greina einstök vörumerki.


Sitt sýnist hverjum um sykurskatt Og enn öðrum annað


Gys.is tók nokkra sérfræðinga af götunni tali og spurði þá út í sykurskattinn sem heilbrigðisráðherra hefur á prjónunum.

Sérfræðingarnir voru ekki á einu máli um orsakir og afleiðingar slíkrar skattlagningar.

Lesendur verða því engu nær, þó þeir lesi alla fréttina. Enda er það ekki tilgangur nútíma vefmiðla að fræða lesendur sína, heldur einungis að fá þá til að smella.



„Já, já, ég held að það sé allt í lagi að hækka skatta á sykur. En það má bara alls ekki hækka verð á fuglafóðri, því þá drepast örugglega dúfurnar mínar úr hungri,“ sagði Davíð D. Davíðsson dúfnaræktandi.



„Mér finnst verstast ef það á kannski líka að hækka skatta á ósykraða drykki, svo sem vatn og jafnvel kannski fiskabúrsvatn,“ sagði Finnur Friðriksson sem býr einmitt í fiskabúri.



„Ég vil bara að bananar séu alveg ókeypis og kosti sem minnst. Ég borða bara banana og vil bara fá að ráða því sjálf að borða bara banana,“ sagði Birna B. Blöndal, bananaæta.




„Sykur er rosalega hollur og næringarríkur og svo er hann líka svo rosalega góður. Ég borða strásykur í morgunmat. Svo fæ ég mér sykurmola í hádegismat og skola þeim niður með sykruðu sykurvatni. Í kvöldmat fæ ég mér svo alltaf vel sykraða sykurleðju. Stundum fæ ég mér samt bjór, en þá set ég rosalega mikinn sykur út í hann, bara til öryggis,“ sagði Ólafur Stephensen, formaður íslenskra sykurkaupmanna.



„Mér er skítsama, svo lengi sem það verður ekki hækkaður skattur á brúnkukremi og þannig,“ sagði Binni brúni.



„Mér finnst rosalega gaman að ráða því hvernig aðrir haga sér. Þess vegna vil ég og ætla að leggja á sykurskatt. Ég drekk bara rauðvín, en aldrei gos og þá vil ég ekki að aðrir drekki það heldur. En ég vil samt líka hækka skatta á rauðvín, af því að fólk er svo vitlaust að ef það er ekki allt fáránlega dýrt, þá kaupir fólk það. Það er ekki nóg að Ísland sé dýrasta land í heimi. Það á að vera LANGDÝRAST í heimi!“ sagði Svandís Svavarsdóttir heilbrigðis- og aðstoðar-forræðisráðherra.



„Er sykur í pitsum? Þá vil ég ekki sykurskatt. Og ekki heldur beikonskatt, af því að ég fæ mér alltaf pitsu með beikoni sko,“ sagði Tóti tölvukall.



„Mér er skítsama. En það er alveg nauðsynlegt að hafa svona mál eins og sykurskatt, áfengi í búðir eða eitthvað þannig, svo að fólk hafi eitthvað tilgangslaust kjaftæði til að rífast um á meðan við rústum öllu og stelum öllu steini léttara,“ sagði Bjarni Ben og hló bæði hátt og dátt.

Og þar hafið þið það.

Stundin






xB 2014






Fara efst á síðu