Fréttir Myndir Gullkorn Gyssurar Þjóðargersemi Sigm Und-ur Ýmislegt Könnunin Fréttabréf Samband
Fréttir Myndir Gullkorn Gyssurar Þjóðargersemi Sigm Und-ur Ýmislegt Könnunin Fréttabréf Samband
Loka valmynd

Kristnihátíð

Hér eru rifjaðar upp fréttir sem Gys.is birti af Kristnihátíðinni miklu á Þingvöllum árið 2000:

gys.is laugardagur 1. júlí kl. 12,31

Rosalega fallegt á Þingvöllum

- Nýjasta frétt af Kristnihátíð

“Þetta gengur alveg rosalega vel hjá okkur,” sagði Kolbrún Halldórsdóttir, alnafna Kolbrúnar Halldórsdóttur dagskrárstýru Kristnihátíðar, í samtali við gys.is um hádegisbil á laugardag, en þá ræddum við við hana í misgripum fyrir alnöfnu hennar, Kolbrúnu Halldórsdóttur.

“Það er alveg rosalega fallegt hérna á Þingvöllum,” bætti Kolbrún við. “Ég hefði bara aldrei trúað því að það væri svona fallegt á Þingvöllum. Ég hef að vísu aldrei komið hérna áður og hélt að þetta væru bara svona vellir eins og fótboltavellir sem maður sér stundum í sjónvarpinu.”

En hversu margt fólk er á svæðinu?

“Það er skal ég segja þér á milli tvö og þrjú þúsund manns, nánar tiltekið eru hér 2.003.”

Hvernig veistu það svona nákvæmlega?

“Heldurðu að við höfum ekki röð og reglu á hlutunum? Hér er skal ég segja þér komin öll Kristnihátíðarnefnd. Það eru níu manns. Svo er ég. Það eru tíu. Svo eru klósettverðirnir – þessir sem voru sendir hingað til að passa að ásatrúarmenn skitu ekki út alla vígðu kamrana. Það gleymdist að senda þá heim þannig að þeir eru hér allir enn. Þeir eru 200. Þá eru komnir 210. Svo eru sko náttúrulega allir pylsusalarnir. Þeir eru 355. Þá eru komnir 565. Svo eru allir skemmtikraftarnir. Þeir eru samtals 1.435. Samtals eru þetta sem sagt nákvæmlega 2.000 manns. Og svo eru hérna einhverjir þrír sem ég þekki ekki. Sem sagt alls nákvæmlega 2.003.”

En hvernig gengur dagskráin fyrir sig?

“Ja... sko... við... Fyrst vissum við ekki alveg hvað við ættum að gera. Við áttum svona hálfpartinn von á... ja... sko... að það yrðu aðeins fleiri mættir skilurðu. Ekki svo að skilja að við séum ekki ánægð með þessa glæsilegu þátttöku. En á endanum ákváðum við að fresta ekki dagskránni heldur láta hana í staðinn byrja svona smám saman.”

Byrja smám saman, hvernig þá?

Það er ósköp einfalt. Hún byrjar bara voða, voða hægt. Sko. Fyrst á einhver að halda ræðu. Hann stígur fyrst öðrum fætinum upp á sviðið og svo hinum – hálftíma seinna. Þannig heldur hann áfram þangað til hann er kominn alla leið í ræðustólinn. Hann lagði af stað á tilsettum tíma, klukkan níu í morgun og nú er klukkan hálfeitt. Núna. Rétt um leið og við erum að tala saman sagði hann “Góðir” og svo klukkan eitt segir hann sennilega “Íslendingar” eða “hátíðagestir” eða eitthvað svoleiðis.”

 

gys.is laugardagur 1. júlí kl. 12,43

Fréttabann

- Allra nýjustu fréttir af Kristnitökuhátíð

Fyrir tíu mínútum sendu Kristnihátíðarnefnd og lögreglan í sameiningu fréttatilkynningu á alla fjölmiðla og bannaði þeim að viðlagðri refsingu að greina frá því að umferð verður, á meðan á Kristnihátíð stendur, aðeins leyfð til Þingvalla en ekki til baka. Að sögn Kristnihátíðarnefndar og lögreglu stendur þessi ákvörðun um einstefnu til Þingvalla ekki í neinu sambandi við dræma aðsókn að hátíðinni, heldur er einungis af “umferðartæknilegum” ástæðum.

“Vandræðin sem urðu á þjóðvegahátíðinni sælu um árið, stöfuðu fyrst og fremst af því að við vorum svo vitlausir að leyfa umferð í báðar áttir. Þess vegna sat fólk unnvörpum kyrrt í bílum sínum og vissi ekki hvort það var að koma eða fara af því að það var búið að gleyma í hvora áttina bíllinn sneri. Ef allir bílarnir hefðu snúið eins, hefði fólk þó að minnsta kosti ekki alltaf þurft að vera spyrja lögregluna hvert það væri að fara,” segir orðrétt í fréttatilkynningu Kristnihátíðarnefndar og lögreglu.

 

gys.is laugardagur 1. júlí kl 13,14

Kristnihátíð aflýst

- Allra, allra nýjustu fréttir af Kristnihátíð

“Já. Ég er alveg ákveðinn. Þessari Kristnitökuhátíð er hér með aflýst,” sagði herra Karl Sigurbjörnsson alnafni biskups, þegar gys.is ræddi við hann í misgripum fyrir alnafna hans, biskupinn, fyrir stundu. “Þessi hátíð er haldin á fölskum forsendum. Ég var að frétta það, bara núna rétt í þessum töluðum orðum og hef fengið það staðfest hjá fróðustu sagnfræðingum, að sú kristni sem var lögtekin á Alþingi fyrir þúsund árum var ekki hin eina sanna og rétta evangelíska lútherska trú, heldur kaþólsk trú – sem sagt svokölluð páfavilla, sem öldum saman hefur verið talin villutrú hér á landi og ætti auðvitað ekki að líðast.”

Herra Karl Sigurbjörnsson, alnafni biskups, kvaðst einnig hafa afráðið, í góðu samráði við alnafna menntamálaráðherra að láta endurskrifa Íslandssögubækur og láta Þorgeir Ljósvetningagoða taka Lútherstrú undir feldinum í nýju útgáfunni. “Með þessu móti gæti farið svo, að allir verði búnir að gleyma þessu, þannig að hægt verði að halda almennilega hátíð á Þingvöllum árið 3000. En þá verður líka að passa kamrana betur. Því ég var nefnilega að frétta að á meðan einn kamarvörðurinn skrapp á klósettið, hefðu hvorki fleiri né færri en þrír ásatrúarmenn gripið tækifærið og skitið í hinn heilaga, vígða kamar sem hann átti að gæta. Ástæða þess að þetta gat gerst voru auðvitað þau mistök í skipulagningu að hafa reglurnar svo strangar að kamarverðirnir þurftu að fá leyfi hver hjá öðrum til að skíta... ég meina auðvitað... hægja sér. Ef menn hefðu mátt gera þetta hver á sínum kamri hefði aldrei neitt þvílíkt getað gerst.”

 

gys.is laugardagur 1. júlí kl 13,31

Reyndust vera útlendingar

- Allra, allra, allra nýjustu fréttir frá Kristnitökuhátíð

“Jú. Það er alveg rétt,” sagði Kolbrún Halldórsdóttir alnafna Kolbrbúnar Halldórsdóttur dagskrárstýru Kristnitökuhátíðar, þegar gys.is ræddi aftur við hana fyrir mistök nú rétt áðan. “Ég mátti til með að athuga nánar hvaða þrír undarlegu menn þetta væru – þessir sem ég sagði ykkur frá áðan. Þeir virtust ekki hafa hugmynd um eitt eða neitt og töluðu ekki einu sinni íslensku, þannig að ég er nokkuð viss um að þetta eru útlendingar. Ég skildi ekkert hvað þeir sögðu. Þeir sögðu bara: “Men vi skulle jo til Kanarieøerne,” eða eitthvað svoleiðis.”

Þú átt við að það sé í raun og veru ekki einn einasti Kristnitökuhátíðargestur mættur á svæðið ennþá?

“Nei, nei, nei. Elsku besti. Það er alveg fjöldi manns. Sagði ég þér ekki áðan að hér væru á þriðja þúsund manns. Og þeim hefur sko fjölgað síðan.”

Hve mikið?

“Um fjóra. Hjón með tvö börn. Og það eru sko alveg örugglega Íslendingar.”

Hvernig geturðu verið viss um það?

“Það er sko af því að maðurinn spurði mig til vegar að Laugarvatni.”

Og þú hefur vitað svarið?

“Ja... sko... ég sagði náttúrulega bara að þau væru komin og benti þeim á Þingvallavatn. Ég var svo sem ekki beinlínis að segja neitt voða mikið ósatt. Þetta er þó allavega vatn og í dag er auk þess laugardagur.”

 

 

gys.is laugardagur 1. júlí kl. 13,36

Enn fjölgar á svæðinu

- Allra, allra, allra, allra nýjustu fréttir af Kristnihátíð

“Jú, jú, mikið rétt,” sagði Kolbrún Halldórsdóttir í misgripum. Sem sagt gys.is ræddi við hana í misgripum enn eina ferðina. Við vissum ekki betur en hún væri alnafna sín. “Það eru núna að bætast við alveg fjölmargir bílar: 1, 2, 3, 4, 5, 6, 7, 8, 9, 10, 11, 12, 13, 14, 15, 16, 17, 18, 19, 20, 21, 22, 23, 24, 25, 26, 27...”

Við hjá gys.is ætlum að skreppa í kaffi á meðan Kolbrún heldur áfram að telja en lofum að birtast aftur með nýjustu fréttir á netinu um leið og hún er búin.

 

gys.is laugardagur 1. júlí kl 13,62

Enn fjölgar... framhald

- Allra, allra, allra, allra, allra nýjustu fréttir af Kristnihátíð.

“97, 98, 99, 90og10, afsakið 100, 101, 102. Já sem sagt voru 102 bílar að renna í hlað hér á Þingvöllum. Og það eru tveir í hverjum. Þá eru sem sagt alls komnir 2.211. Bílarnir eru allir eins og þetta eru allt karlmenn. Nú verður fjör. Hverjir skyldu þetta vera? Jú... auðvitað. Nú skil ég. Þeir eru allir í einkennisbúningum. Þetta er lögreglan.”

 

gys.is laugardagur 1. júlí kl. 16,01

Vegalokanir bera góðan árangur

- Spánýjar nýjustu fréttir frá Kristnitökuhátíðinni miklu

“Jú, það er alveg satt. Þetta lítur miklu betur út núna,” sagði Júlíus Hafstein, alnafni Júlíusar Hafstein formanns Kristnitökuhátíðar, þegar gys.is ræddi nýlega við hann af misgáningi, en ætlun okkar var að sjálfsögðu að ræða við formanninn sjálfan. “Vegalokanir lögreglu hafa skilað alveg stórkostlegum árangri. Alveg brillíant hugmynd, verð ég að segja. Ég vissi satt að segja ekki að svona greindum og hugmyndaríkum mönnum væri hleypt í gegnum lögregluskólann. Það eru ekki nema tveir tímar síðan hugmyndinni var hrint í framkvæmd og nú eru hér á Þingvöllum líklega yfir 10 þúsund manns.”

En hvers konar vegalokanir voru þetta?

“Þetta eru alveg snilldarlegar vegalokanir. Þeir lokuðu sko hringvegi 1 til vesturs fyrir vestan Selfoss og beindu allri umferð til Reykjvíkur um Þingvelli. Þeir segja fólki bara að það neyðist því miður til að fara Þingvallhringinn til Reykjavíkur vegna þess að ekki sé hægt að fara yfir Hellisheiðina vegna tæknibilunar í vegbúnaði. Svo koma allir hingað uppeftir og þá kemur í ljós að það er einstefna til Þingvalla yfir Mosfellsheiðina. Þannig að fólk situr einfaldlega fast hér.”

Þetta er óneitanlega snjöll hugmynd.

“Já. En lokunin á Ölfusárbrú til austurs er nærri því ennþá sniðugri. Þar verða þeir sem ætluðu frá Reykjavík og eitthvað austur á land að snúa við. Þegar þeir koma svo að Þingvallafleggjaranum komast þeir heldur ekki í bæinn aftur og verða að fara sömu leið og allir hinir. Og þeir sem ætla svo að laumast þaðan austur á Laugarvatn uppgötva að það er líka einstefna á þeim vegi til Þingvalla. Alveg samsvarandi vegalokanir eru svo í gildi að norðanverðu. Hvalfjarðargöngin eru einfaldlega lokuð og þeim sem ætla úr Reykjavík norður í land er beint inn á Mosfellsheiðina og niður í Kjós en á Kjósarleiðinni er einstefna fyrir þá sem eru á leið til Reykjavíkur að norðan. Þeir eru látnir aka fyrir Hvalfjörð og svo inn í Kjós. Okkur datt ekki í hug nein sniðug ástæða til að loka brúnni yfir Laxá í Kjós þannig að við sprengdum hana bara. Við segjum öllum að hún hafi hrunið í jarðskjálftunum um daginn.”

 

 

gys.is laugardagur 1. júlí kl. 16,33

Lamaðir og dasaðir verða bara að labba

- Alveg næstum því ný frétt frá hinni nýju og glæsilegu Kristnihátíð á Þingvöllum

“Nei, að vísu gleymdist að gera ráð fyrir aðgengi fyrir fatlaða, lamaða og dasaða, og svo gamlar konur með barnavagna og svoleiðis fólk,” sagði Júlíus Hafstein alnafni nafna síns, formanns hinnar miklu og glæsilegu nefndar í einlægu og opinskáu samtali við gys.is fyrir fáeinum mínútum. “Við höfum heyrt eitthvað um að svoleiðis fólk sé eitthvað að kvarta yfir því að þurfa að labba þessa tvo kílómetra frá bílastæðunum. En ég sé enga ástæðu til að fárast neitt yfir því. Þetta er nú ekki langt. Ég fór þetta sjálfur á jeppanum í morgun og var ekki nema tvær mínútur eða svo.”

Já, en varstu ekki að segja að þetta fólk þurfi að ganga?

“Jú, jú. Auðvitað verða allir að labba. Það gildir auðvitað það sama um hjólastóla og önnur vélknúin farartæki. Það er öll umferð vélknúinna farartækja bönnuð á svæðinu.”

Já en hjólastólar eru nú yfirleitti ekki vélknúnir, er það?

“Hvað veit ég um það. Eru ekki fjögur hjól undir þeim? Eru ekki fjögur hjól undir vélknúnum farartækjum? Sem sagt hjólastólar eru vélknúin farartæki?”

Þannig að þið leyfið þá til dæmis mótorhjól?

“Já, já. Ég á til dæmis sjálfur mótorhjól, þannig að mér er fullkunnugt um að þau eru bara með tvö hjól og geta þar af leiðandi ekki talist vélknúin farartæki.”

En reiðhjól?

“Reiðhjól. Nei. Maður veit aldrei nema einhver hefði getað laumast til að setja hjálparvél á reiðhjólið sitt. Við tökum enga sénsa hér. Enhverjar reglur verða nú að vera.”

Og fá fatlaðir enga hjálp við að komast um svæðið?

“Ertu vitlaus maður. Hér eru allir í fullri vinnu. Það hefur enginn tíma í að sinna neinu svoleiðis veseni. Lögreglan hefur til dæmis í nógu að snúast við að gera leikfangabíla upptæka á svæðinu. Þeir eru sem sé með fjögur hjól og þar af leiðandi vélknúin ökutæki í skilningi laganna. Auk þess var enginn að biðja þetta fólk að koma hingað. En nú má ég ekki vera að því að tala við þig lengur.”

Er mikið að gera hjá þér?

“Já ég er hér á fullri ferð um hátíðasvæðið að fylgjast með því að hátíðin gangi almennilega fyrir sig.”

Hvaða smellur var þetta sem ég heyrði í símanum?

“Það var einhver fótgangandi hálfviti sem var ekki nógu snöggur að koma sér frá. Ég neyðist til að stoppa og fara út til að gá hvort það sjáist nokkuð á jeppanum.”

 

 

gys.is sunnudagur 2. júlí kl 22,73

Tókst afar vel í alla staði

- Lokafrétt frá Kristnihátíð

“Jú það má nú segja að þetta hafi gengið afar vel í alla staði,” sagði Júlíus Hafstein alnafni nafna síns, formanns nefndarinnar þegar gys.is mistókst enn eina ferðina að ná tali af alnafna hans og varð að láta sér nægja að ræða við hann í staðinn. “Það eru allir afskaplega ánægðir. Meira að segja eru flestir sem neyddust til að koma hingað vegna vegalokana nokkurn veginn hættir að nenna að kvarta. Að vísu virkuðu vegalokanir ekki nógu vel seinni daginn. Þrátt fyrir algert fréttabann virðist þetta einhvern veginn hafa síast út þannig að það hafa bara þrjú þúsund bæst við í dag. En það urðu þó alla vega alls 16 þúsund manns.”

Spurst út? Ekki höfum við sagt orð hér á gysinu.

“Nei, nei. Ég er ekkert að kenna ykkur um þetta. En við vorum búnir að lofa því að allir gætu verið í gsm-sambandi frá hátíðinni og settum upp gsm-sendi hérna. Við treystum auðvitað á það að kerfið myndi hrynja undan álaginu. En vegna þess hve fáir komu þá virkaði símakerfið allan tímann. Og ég held einfaldlega að það hafi verið hringt héðan til að vara fólk við.”

Og hvað tekur nú við hjá þér persónulega? Þú brunar náttúrulega á jeppanum í bæinn.

“Nei. Svo vitlaus er ég ekki. Heldurðu að ég ætli að fara að sitja fastur í umferðinni í bæinn í marga klukkutíma. Ég læt auðvitað þyrlu Landhelgisgæslunnar sækja mig.”

Liggur þér svona á?

“Auðvitað liggur mér á. Nú er þessu starfi lokið og ég er sem sagt orðinn launalaus. Það gengur ekki. Ég verð strax að ganga frá því að láta ráða mig sem formann Alþingishátíðarnefndarinnar 2030. Það veitir ekki af að byrja strax að undirbúa þá hátíð.”

Það er auðvitað slæmt að vera launalaus lengi.

“Já. Það gengur ekki. Ég geri að vísu ekki ráð fyrir að þetta verði nema hálft starf fyrstu árin þannig að ég fæ sennilega ekki nema hálfa milljón á mánuði til að byrja með.”

Hálfa milljón á mánuði í 30 ár. En það eru 180 milljónir.

“Skítur á priki, elsku kallinn. Auk þess verður það nú eitthvað aðeins meira. Það verður náttúrulega strax að ráða ritara í fullt starf og við verðum sjálfsagt að borga henni eitthvað, konur þurfa víst líka að fá kaup á þessum jafnréttistímum, þannig að þetta gæti nálgast 190 milljónir alls á þessum 30 árum. Og þegar ég hugsa mig um þá sé ég að þetta verður auðvitað meira því að við eigum eftir að reikna með ferðakostnaði. Í svona starfi þarf mikið að hugsa og það getur verið erfitt að hugsa hérna heima á klakanum, þannig að ég þarf sjálfsagt að skreppa annað slagið til Kanaríeyja. Það er afskaplega gott að hugsa þar í sandinum, skal ég segja þér.”

Hvaða hávaði er þetta sem ég heyri í símanum?

“Það er nú bara kominn jarðskjálfti elsku karlinn. Og það meira að segja alvöru skjálfti. Það titrar allt og skelfur hér undir fótunum á mér. Þetta sáu þeir ekki fyrir jarðfræðingarnir. Þeir kunna ekki að skipuleggja neitt. Það er munur eða ég. Þetta er tignarlegur endir á hátíðinni. Og nú sé ég að vestri bakkinn á Almannagjá er að hrynja. Hann kemur bara niður í heilu lagi.

Hvar ertu staddur? Sérðu þetta vel?

“Ég er staddur á besta stað. Ég sé þetta alveg fullkomlega. Hvílík dýrð! Vesturbakkinn er svo hár að hann er lengi á leiðinni niður.

Er engin hætta á mannskaða? Er enginn í gjánni?

“Nei, nei. Elsku kallinn. Það er enginn í gjánni núna nema ég... Ha. Hvað sagði ég? ÉG!!! Af hverju geta þessir jarðfræðingar aldrei skipulagt neitt almennilega....”

 







Eldhúsdagsdansinn

Íhuga að breyta gangi klukkunnarRíkisstjórn Íslands íhugar nú bæði í gríni og af fullri alvöru að breyta gangi klukkunnar. Nokkrar hugmyndir eru uppi á borðinu, hver annarri betri.

Ein hugmyndin er sú að lengja sólarhringinn um eina klukkustund eða svo. Þá hafi fólk meiri tíma til að vinna.

Önnur hugmynd er að stytta sólarhringinn um allt að tólf klukkustundir, svo fólk hafi ekki tíma til neins nema að vinna. Að auki verður þá enginn tími fyrir fólk til þess að kvarta undan ríkisstjórninni.





Fara efst á síðu